Ubuntu Netbook Remix

• 
• 

Xehetasunak

Kategoria: sarean

Noiz argitaratua: Azteazkena, 27 Urtarrila 2010 00:00

Nork idatzia: Gorka Julio

Ordenagailu eramangarri txiki eta merkeak asko ugaritu dira. Eramangarri txiki berri hauek aurrekoak baino merkeagoak eta oraindik eramangarriagoak dira. Kamara eta mikrofonoa izaten dituzte, pantaila txikiak eta prozesadore mantsoagoak. Prozesadore hauek erabiltzen dituzten arren, egin beharreko ekintzetarako nahikoak izaten dira. Gainera, prozesadore hauei esker bateria gutxiago behar izaten dute.

Ordenagailu txiki hauek netbook izena hartzen dute eta Windows sistema eragilea edota beste sistema eragile bat erabil dezakete. Batzuetan bi sistema eragilek eramangarri berean dabiltza, hasieran bat edo beste aukeratu behar izaten delarik. Gure eskoletan ere laster ikusi ahal izango ditugu. Hala ere, eramangarri hauen izaera berezia kontutan hartuta, hauentzako bereziak diren sistema eragileak ere sortu dira. Horietako bat Ubuntu Remix.

Ubuntu Remix GNU/Linux banaketa, bereziki prestatua dago era honetako eramangarrietan egiten ohi ekintza ohikoenak egiteko. Sistema osoa eta aplikazio gehienak euskaraz egoteaz gain, tresna sorta bikain bat du instalaturik.

• Web nabigatzailea: Mozilla Firefox
• E-mail bezeroa: Evolution
• Berehalako mezularitza eta bideo konferentzia: Empathy
• Multimedia erreproduzigailua: Rhytmbox
• Bideo erreproduzigailua: Totem
• Irudi edizioa: GIMP
• Irudi bildumen kudeaketa: F-spot
• Ofimatika: Open Office

Aplikazio hauetaz gain, beste asko instala daitezke oso erraz, "Ubuntu software-biltegia" erabiliz. Jokoak, hezkuntzarako programa bereziak...

Horretaz gain, bereziki prestatua dago bateria gutxi kontsumitzeko. Sistema eragileak berak gehien erabiltako programak erraz atzitzeko gogokoenak izeneko atal bat dauka. Beste aplikazioak ere gaika antolatuak daude eta erabiltzeko oso erraza da. Dudarik gabe era honetako eramangarrietan erabiltzeko sistema eragile interesgarria da. Ubuntu sistema eragilearen aukera guztiak ditu, eramangarri hauetara egokiturik.

Androide bat zure mugikorrean

• 
• 

Xehetasunak

Kategoria: sarean

Noiz argitaratua: Osteguna, 07 Urtarrila 2010 00:00

Nork idatzia: Gorka Julio

Android gailu mugikorrentzako sistema eragile libre bat da. Googlek sortu zuen, baina orain Open Handset Alliance-k du kudeatzeko ardura. Sistema eragile honen oinarria Linux kernel bat da. Libre izatea eta aplikazio berriak sortu ahal izateko eskaintzen diren lan tresnak, Android etorkizun handiko sistema eragilea dela argi dago.

Azken boladan gailu mugikorren munduan aldaketa sakonak izaten ari dira. Oraingo telefono mugikor aurreratuek adibidez kamara, gps-a, sentsorek, pantalla ukigarriak etab. dituzte. Horretaz gain wifi sareak erabiliz Internetera konektatzeko aukera izateaz gain, 3G konexio bidez edozein tokitatik Internetera konektatzeko aukera daukate. Honek gailu hauek erabiltzen ditugun modua guztiz alda dezake eta Android sistema eragileak aldaketa horretan parte hartzeko aukera ematen digu.

Android duten zenbait gailu mugikor agertzen hasi dira jada. Lehenengoa Googleren G1a izan zen, batez ere garapenean lan egiteko pentsatutako mugikorra. Ondoren etorri ziren HTC Magic, HTC Hero edota HTC Tatto mugikorrak ere. Azkena Googlek berak Nexus ONE izenekoa atera du. Kalitate handiko pantaila ukigarria, 5Mpx-etako kamara, GPS-a, wifi eta 3g konexioak... izango digu.

Sistema eragile librea izanik gure aplikazio propioak sortu ahal izango ditugu, eskaintzen diguten framework-a erabiliz. Baina, ez dugu zertan programatzen jakin behar, Android Market izeneko aplikazio biltegian aplikazio sorta izugarria dago eta hauetako baten bat gure beharretara egokitu daiteke. Android Market horretan dohaneko eta ordainpeko aplikazioak aurkitu ditzakezu.

Aplikazio interesgarri batzuk

• Atrackdog: aplikazioek, bertsio berriak izaten dituzte, baina askotan ez dute aldaketa horien berri ematen. Tresna honek lan honetan laguntzen gaitu.
• AndFTP: FTP zerbitzarietara konektatzeko tresna bikaina.
• Barcode Scanner: barra kodeak eskaneatzen ditu eta hauei buruzko informazioa eman.
• Netcounter: interneten igarotako denbora neurtzen laguntzen du. Oso interesgarria tarifa laurik ez baduzu.
• Twidroid: Twitter erabiltzailea bazara, tresna honek sare sozial horretan idazten lagunduko dizu.
• Listen: gustoko dituzun podcast eta audioetara izen emateko balio duen aplikazioa.
• Goggles: bilaketa grafikoak egiteko balio duen tresna. Kamararekin zerbaiti argazkia atera eta sistemak ikusten duen horri buruzko bilaketaren emaitzak emango dizkigu. Ez da guztiz fidagarria oraindik.
• Layar: GPS-a eta Interneterako sarbideari esker, kamaratik ikusten ari garenaren gainean informazioak gaineratzen ditu, argazkiak, Wikipediako informazioa, jatetxeak, hotelak...

Aplikazio guzti hauek eta sortuko direnak Android gailu mugikorrentzako etorkizun handiko sistema dela esan genezake.

bederatzi@2009

• 
• 

Xehetasunak

Kategoria: sarean

Noiz argitaratua: Astelehena, 21 Abendua 2009 00:00

Nork idatzia: Gorka Julio

Joxe Rojas bere Teknopataren txokoan, blogosferako hoberena zer izan den proposatu eta bozkatzeko aukera ematen du. Ekimen hau 2007tik egin du eta hasieran zazpi@2007 deitzen bazen gaur egun bederatzai@2009 da. Azkenean, blogosfera euskaldunaren inguruan sortutako ekimen interesgarrienak Internauta euskaldunek aukeratzeko egindako ekimena. Balioa zehazki horretan aurkitzen da. Ez dago laguntza instituzionalik, ezta dirurik, baina Internauta euskaldunek bozkatzen dute eta hori da gauzarik interesgarriena

Parte hartzeko bidea hau da

• Hasierako fasean jendeak bederatzi@2009 wikian proposamenak egiten ditu. Hautagai proposamenak egin ditzakezue euskal blogosferak 2009an emandako 9 gauza onen artean egoteko. Bloga, webgunea, ekimen kolektibo edo partikularra, gertaera… izan daiteke. Horretarako webgunea izanez gero euskaraz egon behar du eta proiektua 2009. urtekoa izan behar du.
• Bigarren fase batean, urtea amaitu bitartean, bozketa egiten da onartutako hautagai guztien artean.
• Epea amaitutakoan, 2010eko hasieran, zerrenda argitaratzen da aukeratutako 2009ko bederatzi ekimen interesgarrienekin.

Ekimena leihaketa baten moduan pentsatua dagoen arren, ez du benetan leihaketa zentzua. Batez ere, urte horretan sortutako proiektuei errepasoa egiteko balio du. Egiten diren aurrerapausoak ikusi eta ezagutzera emateko era bat besterik ez da.

Aurten gainera, parte hartzen dutenen artean sari txiki bat banatuko da. Berde koloreko teklatu biguin tolesgarri bat. Webgunean bozkatu ostean, Twitterrera mezu bat bidali beharko da, hiru baldintza hauek beteaz:

1. #b2k9 etiketa jartzea
2. Lotura hau sartzea: http://bit.ly/8fbHMG
3. BEDERATZIrekin errimatxoa egitea. (BEDERATZI hitza bera ez da ezinbestekoa)

Adibidez: Bozkatu dut bederatzi eta pasatu dut txatxi, #b2k9 http://bit.ly/8fbHMG

Aurtengo uztan oso ekimen interesgarriak daude:

• NickdutNik
• AnHitz
• ZuZeu.com
• EuskalMapa.com
• GrebaOrokorra.info
• Hitzokei
• Gipuzkoako argazki zaharrak lizentzia libreaz
• Tokiko.tv
• Xuxen Bizkaieraz
• Eskerrik Asko Andereño
• JoomlaEuskaraz.org
• EtxekoAndroid.com
• GureArrantzaleakAskatu.org
• GauzenInternet.com
• VLOG
• EgiaNahiDugu.org
• Blogak eta letrak
• Azkue Fundazioa
• Meatzaldeko Berbalagun
• KKKP
• Taupada
• Lehen JoomlaKafea Bilbon
• GorriBeltzean
• Mikelen txokoa

Bozkatu nahi baduzue zuen proiektu gogokoena, baina behintzat ezagutzen ez dituzuen ekimenak ezagutu, hori baita honen guztiaren helburua

XXI. mendeko telefonoa

• 
• 

Xehetasunak

Kategoria: sarean

Noiz argitaratua: Osteguna, 26 Azaroa 2009 00:00

Nork idatzia: Gorka Julio

VoIP edo Internet bidez deiak egiteko aukera ezaguna da aspaldi gure artean. Ordenagailu bat eta Internet konexio batekin bakarrik deiak egiteko aukera dugu teknologia horren bidez. Askotan dei horiek telefonoz egindakoak baino merkeagoak dira eta ordenagailuen artean izaten direnak beti dira dohainik. Horrelako programak dira Skype, Gizmo, Google Talk...  Baina horretaz gain, telefonoaren bidez komunikatzeko izaera ez da asko aldatu azken aldian. Orain aldiz, telefono arrunta Interneteko garaietara egokitzeko zenbait zerbitzu agertzen hasi dira, horien artean FonYou.

Zerbitzu honetan izen ematean telefono zenbaki arrunt bat lortzen duzu. Zenbaki hori izango da zure FonYou zenbakia. Zerbitzuaren webgunearen bidez, telefono horretara iristen diren deiekin zer egin erabakitzeko aukera izango duzu.

Deien filtroa

Tresna honen bidez jasotzen dituzun deiekin zer egin nahi duzun erabaki dezakezu. Iristen diren deiak beste telefono batera edo batzuetara bideratu ditzakezu. Edota pertsonaren arabera, deia erantzungailura zuzenean pasa. Ikus dezakezunez ez dituzu beste telefonoak utzi behar, zerbitzu hau zure oraingo telefonoekin bateragarria da.

Erantzungailu pertsonalizatua

Deitzailearen arabera erantzungailuak mezu bat edo beste eman dezake. Berez dakartzan mezuak erabili edo zure audio mezua grabatu dezakezu. Ondoren zure kontaktuetako zeini egokitzen diozun erabaki beharko duzu.

Audio mezuak kudeatu

Erantzungailura iristen diren mezuak Internet bidez entzun eta kudeatu ahal izango dituzu. Posta elektronikoko mezuak kudeatzea bezala da. Nahi dituzun mezuak entzun, ezabatu edota deskargatu ditzakezu.

Erabiltzeko ideia batzuk

• Honen bidez mugikor zenbaki publiko bat eskaini dezakezu zure webgunean, sare sozialetan, blogetan etab. Edozein momentutan zenbaki bat blokeatu dezakezu zure benetako zenbakia eman gabe.
• Zure elkarte edo enpresaren zentralita izan daiteke. Momentu bakoitzean zure deiak nora zuzendu behar diren erabaki dezakezularik.
• Interneten erosketak egin behar badituzu, telefono hau baliatu dezakezu eskariak jasotzeko eta pribatutasuna mantentzeko.
• Hainbat telefono linea telefono bakar batetik kudeatu nahi badituzu ere, aukera ona izan daiteke.

Google handiak, berdina egiten duen Google Voice zerbitzua eskaintzen du, baina oraindik ez da guregana iritsi. Hala ere, beste aukera bat ere badago. Software libreak beti ateak irekita uzten dizkigu eta Asterisk erabiliz, gure zentralita propioa eraikitzeko aukera beti hor izango duzu.